Mien Urgroßvadder up den Tietenhof weuer bi den Grafen Bothmer in Lambrüch (Lauenbrück) bemeiert, dat Hus gehür den Graf, mien Uropa gehür blos noch dat Inventar. Uderdem gehür den Grafen ok den ganzen Acker, ok wenn de Bur em sülbst urbar makt har. Uderdem müß mien Uropa alle Freuhjoahr dree Daag Meß feuhrn un dree Daag Törf graben, in Sommer müß he Gras un Kurn maihn: Denn müß he eenige Bund Dackstroh liebern un noch eenige Kleenigkeiten. Üm 1850 kunn mien Uropa sik lut Gesetz freeköpen. Alle jährlichen Leistungen würn in Geld ümregt, un dat müß he 25 Joahr in Vörut betahlen, dat weuern 600 Doler. Ober nu weuer he free’er Bur. Dat ganze heet man de Ablöse, Hus un Acker hürn nu wedder den Burn sülbst, dor harn de Burn lang üm kämpft. Annere Burn in Dörp de bi dan Herzog bemeiert würn, käumen dor beter von aff, se müssen blos 250 Doler betahlen, denn de bruken dor ja keen Törf tau graben, keen Meß tau feuhrn un nich tau maihn. Se müssen wohl Holt haun un ok mal Füürholt na de Borg in Horborg bringen.

Tau de Spezialdeelung üm 1850 is noch eeniget tau schrieben, hier wür dat ganze nich urbar gemakte land von de Gemeen up de eenzelnen Burn verdeelt. Dat weuern ja 10 Vullhööf, 4 Kötner, de in de ierste Hälfte von 17. Joahrhunnert sik hier ansiedelt häbt. Een Joahrhunnert later käumen noch twee Neebauer, Nr. 15 un 16. Ünner de 16 Burn wür de Gemeen verdeelt, wieveel he kriegen dä, läg doran, wieveel Veeh he in de letzten tein Joahr in Stall har. Uderdem wür dat ganze Gebiet up Kauhwerte updeelt. Een Kauhwert is de Fläche, de eene Kauh fär een Joahr taun beweiden nötig hät, de Fläche is natürlich in Niederungen veel lütter at in de Dröge Hei’. Dat allns is gerecht makt worn, alle Burn häbt den Reces ünnerschreben. 1 Kuhwert sünd 2 Peerwerte, 8 Schwienwerte 12 Heidschnuckenwerte un 20 Gäuswerte.